Föstudaginn 3. september verður opnuð sýning á verkum Guðmundar Rúnars Lúðvíkssonar í Listasafni Reykjanesbæjar. Um einskonar innsetningu er að ræða þar sem unnið er með ljós og myrkur, veggverk og skúlptúra. Heiti sýningarinnar vísar hvoru tveggja til sjónar og blindu sem segja má að sé megin viðfangsefni sýningarinnar. Sýningin er einnig áminning um að ekki er sjálfgefið að veröldin sýni sig öll eins og hún er, þótt öll skynfæri séu virk. Listamaðurinn ætlast enda til að verkin séu snert auk þess sem í uppröðun þeirra er falið orðið „snertið" á blindraletri. Segja má að sýning Guðmundar Rúnars sé eins konar gagnrýnin úttekt á því hvernig við hin sjáandi umgöngumst veröldina og um leið tilraun til að búa til myndlist sem miðlar innihaldinu bæði til sjáandi fólks og blindra. Safnið gefur að venju út vandaðan litprentaðan bækling á ensku og íslensku um sýninguna en að auki verða prentaðir bæklingar á blindraletri.   Sýningin er á dagskrá Ljósanætur, menningarhátíðar Reykjanesbæjar og stendur til 17. október.  

Framlag Listasafns Reykjanesbæjar til Listahátíðar 2010 er sýningin Efnaskipti eða Metabolism,sem er samvinnuverkefni safnsins og fimm myndlistarkvenna: Önnu Líndal, Guðrúnar Gunnarsdóttur, Hildar Bjarnadóttur, Hrafnhildar Arnardóttur og Rósu Sigrúnar Jónsdóttur. Sýningarstjóri er Aðalsteinn Ingólfsson.   Á sýningunni er að finna fimm innsetningar úr blönduðum efnum, mjúkum efnum, aðskotahlutum, ljósmyndum, plastefnum, myndböndum o.fl. Í verki Önnu Líndal eru „viðgerðin" og hugmyndir henni tengdar í aðalhlutverki. Um verkið segir Anna: „Viðgerðin er áþreifanleg heimild um samskipti einstaklings við hlut úr umhverfi sínu. Þetta eru persónuleg samskipti sem mótast á mismunandi hátt hjá þjóðum." Guðrún Gunnarsdóttir sýnir veggmynd sem snýst um þær fiskitegundir sem veiðast úti fyrir Reykjanesi. Hún segir: „Fiskiveiðar eru oftast tengdar karlmönnum, en mig langaði til að tengja fiskinn við hið kvenlega, svo sem útsaum, léttleika." Hildur Bjarnadóttir gerir tvíþætt verk, annars vegar innsetningu sem hverfist um spunavél frá gamla Bændaskólanum í Ólafsdal, hins vegar smærri innsetningu um íslenskan rokk frá Brennistöðum og köttinn Dúsu sem er heimilisföst í húsakynnum Listasafns Reykjanesbæjar. Framlag Hrafnhildar Arnardóttur er innsetning úr plasti og mjúkum gerviefnum sem er eins konar tilbrigði við eldgos og hraunrennsli. Innsetning Rósu Sigrúnar Jónsdóttur heitir Lífgrös, og er margbrotin hugleiðing um hamingjuna og íslensk grös

Um helgina lýkur ljósmyndasýningunni Spegilsýnir sem er tilraun til að ögra 6 valinkunnum ljósmyndurum til að gerast „speglamenn" þ.e. að nota ljósmyndina til tjáningar á einkalegum viðhorfum, að virkja hið hlutlæga til að draga fram hið huglæga í stað þess að nota hana eingöngu til hlutlausrar frásagnar af hinu séða líkt og „gluggamenn." Þau Bára Kristinsdóttir, Einar Falur Ingólfsson, Jónatan Grétarsson, Katrín Elvarsdóttir, Spessi og Þórdís Erla Ágústsdóttir spreyttu sig á verkinu og afraksturinn er stórskemmtilegur. Sýningarstjóri er Aðalsteinn Ingólfsson. Sýningarsalur Listasafns Reykjanesbæjar er í Duushúsum, Duusgötu 2 - 8. Þar er opið frá 11.00 - 17.00 virka daga og 13.00 - 17.00 um helgar og aðgangur er ókeypis.

Ljósmyndasýningin Spegilsýnir verður opnuð í Listasafni Reykjanesbæjar föstudaginn 5. mars kl. 18.00. Listamennirnir Bára Kristinsdóttir , Einar Falur Ingólfsson, Jónatan Grétarsson, Katrín Elvarsdóttir, Spessi og Þórdís Erla Ágústsdóttir eiga verk á sýningunni og sýningarstjóri er Aðalsteinn Ingólfsson.John Szarkowski, yfirmaður ljósmyndadeildar Nútímalistasafnsins í New York (M.O.M.A) og helsti sérfræðingur í bandarískri ljósmyndun setti fram athyglisverða kenningu um ljósmyndun árið 1978 þar sem hann skipti ljósmyndurum í tvo flokka, þá sem litu á ljósmyndun sem tæki til tjáningar á einkalegum viðhorfum, sem sagt speglamenn, og þá sem litu á hana sem tæki til hlutlausrar frásagnar af hinu séða, þ.e. gluggamenn. Sýningin í Listasafni Reykjanesbæjar er tilraun til að ögra nokkrum valinkunnum ljósmyndurum, fá þá til að takast sérstaklega á við spegilhugmyndina sem hér er nefnd. Sumir þeirra hafa alltaf verið spegilmenn, aðrir eru gluggasérfræðingar, en flestir hafa þeir farið bil beggja í ljósmyndum sínum, reynt að virkja hið hlutlæga til að draga fram hið huglæga.

Frásagnir og spjall í í tengslum við sýningu á verkum Eggerts Guðmundssonar "Verk í eigu bæjarbúa" fór fram sunnudaginn 27. september í Bíósal. Erindi fluttu Björn Stefánsson sem sagði frá kynnum sínum af Eggerti og sýningarhaldi því tengdu, Aðalsteinn Ingólfsson listfræðingur, Thor B. Eggertsson sonur listamannsins og Guðlaug María Lewis fræðslufulltrúi Listasafns Reykjanesbæjar. Hægt er að hlýða á þessar upptökur með því að smella á hlekkinn hér fyrir neðan. Einnig er hægt að finna upptökuna með því að smella á sýningar 2009 þar sem finna má meira efni um sýninguna.   Hljóðupptaka frá málstofu um Eggert Guðmundsson

Hópur barna af Bakka á leikskólanum Heiðarseli komu í heimsókn í morgun til að skoða sýningu Björns Birnir, Afleiddar ómælisvíddir, en skólabörn bæjarins eru tíðir gestir á sýningum listasafnsins. Í hópnum fóru fram fjörugar umræður um árstíðir, börnin skoðuðu myndir af ýmsum listaverkum og tengdu þau við ákveðnar árstíðir. Einnig hlustuðu þau á ljóðaupplestur og völdu myndir á sýningunni sem pössuðu við ljóðin.  Þá teiknuðu þau sínar eigin árstíðamyndir undir áhrifum af myndum Björns. Að lokum sungu börnin tvö árstíðalög fyrir safnkennarann af stakri prýði. Myndir frá heimsókninni

Sýning Ingu Þóreyjar Jóhannesdóttur Flökkuæðar - Loftfar í Listasafni Reykjanesbæjar hefur verið valin ein af bestu myndlistarsýningum ársins 2009 af gagnrýnendum og blaðamönnum Morgunblaðsins. Í umsögn dómnefndar segir m.a. um sýninguna: Eftirminnileg sýning þar sem sjá mátti "listvísindalegan þverskurð" af tilbúnum flugminjum með tækni þar sem skúlptúr og málverk blandast saman í vel heppnaða innsetningu. Á sýningunni ríkti tilfinning fyrir háska og björgun um leið og hún vísaði bæði fram og aftur í tímaskynið". Einnig segir: "sýningin fór hljótt sakir þess að vera heila 50 kílómetra frá Reykjavík, en tvímælalaust ein sú besta á árinu". Sýningin var haldin 4. september til 18. október sl. og var efniviður Ingu Þóreyjar farangur og farartæki. Á sýningunni leitaði hún að svæðinu milil svefns og vöku, þess augljósa og þess sem er óaðgengilegt. Sýningin samanstóð af þrívíðum málverkum, máluðum skúlptúrum og hljóð- og ljósaverki sem stillt var upp þannig að úr varð nokkrs konar umferðarmiðstöð

Sýningin Innistæða, verk í eigu Landsbankans, verður opnuð í Listasafni Reykjanesbæjar föstudaginn 23. október kl. 18.00. Á sýningunni má sjá 30 málverk frá tímabilinu 1900-1990 eftir ýmsa helstu listamenn þjóðarinnar og tilraun gerð til að rekja íslenska listasögu með hjálp þessara verka. Sýningin hefur verið í undirbúningi í tvö ár og var alltaf hugsuð sem sérstök skólasýning en Listasafn Reykjanesbæjar er eina listasafnið á Suðurnesjum og hefur þar af leiðandi ýmsum skyldum að gegna auk hefðbundinnar safnastarfsemi. Í stofnskrá safnsins er t.d. mikið gert úr menntunarhlutverki safnsins og sérstaklega tekið fram að því sé ætlað að efla þekkingu og áhuga á myndlist. Sýningarstjóri er Aðalsteinn Ingólfsson. Sjá nánar undir Sýningar 2009

Sunnudaginn 11. október mun myndlistarmaðurinn Inga Þórey Jóhannsdóttir leiða gesti um sýningu sína í Listasal Duushúsa. Leiðsögnin hefst strax að loknum fyrirlestri Einars Garibaldi um samtímalist í Bíósal sem hefst kl. 15.00. Sýning Ingu Þóreyjar, Flökkuæðar - Loftfar var opnuð á Ljósanótt 4. sept. s.l. og stendur til 18. október. Þetta er því næst síðasta sýningarhelgi.

Listaskólinn sem staðið hefur fyrir sumarnámskeiðum fyrir börn frá árinu 2004 býður nú upp á vetrarstarf. Að þessu sinni er boðið upp á 7 vikna myndlistarnámskeið, Undur og gersemar, fyrir 8 - 12 ára börn. Námskeiðið verður haldið í Svarta pakkhúsinu, Hafnargötu 2, á laugardögum frá kl. 11.00 - 13.00. Það hefst 3. október og stendur til 14. nóvember.   Það hefur ávallt verið stefna skólans að bjóða upp á fagmenntaða leiðbeinendur og á því verður engin breyting. Kennari á þessu námskeiði verður Inga Þórey Jóhannsdóttir myndlistarmaður. Hún hefur sinnt myndlistarkennslu, á sæti í Listráði Reykjanesbæjar og hefur umsjón með sýningarrýminu Suðsuðvestur.   Skráning á námskeiðið fer fram á listaskolinn@reykjanesbaer.is eða í síma 898-1202. Námskeiðsgjald er kr. 12.000 og er allt efni innifalið í því. Hægt er að nýta hvatagreiðslur við greiðslu á námskeiðsgjaldi.   Undur og gersemar   Á námskeiðinu verður teiknað, málað og mótað. Gerðar verða tilraunir; leikið og lært um grundavallaratriði sjónlista í tvívídd og þrívídd; form, litur ljós og skuggi. Markmið námskeiðsins er að þjálfa sjónræna athygli, örva skapandi hugsun og persónulega tjáningu, jafnframt því að þroska almenn vinnubrögð og tilfinningu fyrir formi og efni. Leitast við að kveikja áhuga á myndgerð og formhugsun í víðara samhengi, m.a. gegnum listasögu.

Á Ljósanótt verður opnuð sýning á verkum Eggerts Guðmundssonar listmálara í Bíósal Duushúsa. Verkin á sýningunni eru fjölbreytt að efnisvali; olíuverk, teikningar o.fl. en verkin eiga það sammerkt að flest þeirra eru í eigu bæjarbúa sjálfra. Fjölskylda Eggerts lánaði líka nokkur verk og einnig hafa bæði Listasafn Íslands og Listasafn Reykjanesbæjar lánað verk. Sýningin er ekki eiginleg yfirlitssýning en sýnir gott úrval verka hans. Eggert Guðmundsson var fæddur í Stapakoti í Innri-Njarðvík, árið 1906. Hann hóf ungur listnám og lærði m.a. hjá Stefáni Eiríkssyni, Einari Jónssyni myndhöggvara og Ríkharði Jónssyni en haustið 1927 hélt hann út til frekara náms og dvaldi í München í Þýzkalandi í þrjú ár og eitt ár var hann við nám á Íalíu. Dvaldi hann síðan erlendis að mestu til ársins 1940 en flutti þá heim til Íslands. Eggert var vinsæll málari og hélt fjölda sýninga bæði hér á Íslandi og erlendis. Sýningin í Duushúsum mun standa til 27. september.  

Sýningu Olgu Bergmann í Listasafni Reykjanesbæjar sem staðið hefur frá því í maí lýkur um komandi helgi. Olga verður sjálf á staðnum á laugardaginn 8. ágúst frá kl. 15 - 17 með heitt á könnunni og býður upp á óformlegt spjall um sýninguna við gesti og gangandi.Olga hefur farið fremur óhefðbundnar leiðir í listsköpun sinni en nýtur virðingar fyrir áleitin og vönduð verk. Á sýningunni, sem er dagskrárliður á Listahátíð í Reykjavík, er stefnt saman myndbandsverkum, skúlptúrum og fundnum hlutum. Reynt er að skyggnast á bak við þær hugrenningar og tilfinningar sem skapast við missi, áföll eða umbyltingu aðstæðna og leitast við að leiða í ljós hvað sú togstreita sem af slíku hlýst hefur í för með sér svo sem stöðnun eða nýtt upphaf. Sýningarsalur Listasafns Reykjanesbæjar í Duushúsum er opinn virka daga frá kl. 11.00 til kl. 17.00 og um helgar frá kl. 13.00-17.00 og aðgangur er ókeypis.

Listasafn Reykjanesbæjar tekur nú þátt í Listahátíð í Reykjavík í annað sinn með opnun sýningar Olgu Bergmann laugardaginn 16. maí kl. 17.00. Olga hefur farið fremur óhefðbundnar leiðir í listsköpun sinni en nýtur virðingar fyrir áleitin og vönduð verk. Sýningin ber heitið Í húsi sársaukans eða House of Pain þar sem stefnt er saman myndbandsverkum, skúlptúrum og fundnum hlutum. Reynt er að skyggnast á bak við þær hugrenningar og tilfinningar sem skapast við missi, áföll eða umbyltingu aðstæðna og leitast við að leiða í ljós hvað sú togstreita sem af slíku hlýst hefur í för með sér svo sem stöðnun eða nýtt upphaf. Sýningin er í sýningarsal Listasafns Reykjanesbæjar í Duushúsum og stendur til 17. ágúst. Þar er opið virka daga frá kl. 11.00 - 17.00 og um helgar frá kl. 13.00 - 17.00 og aðgangur er ókeypis.  

Reykjanesbær og nágrannasveitarfélög taka nú í fyrsta sinn þátt í hátíðinni List án landamæra þar sem fatlaðir og ófatlaðir vinna saman að ýmsum listtengdum verkefnum. Hátíðin verður sett með formlegum hætti á sumardaginn fyrsta, 23. apríl í Frumleikhúsinu og Bíósal Duushúsa og stendur öllum opin. Frumleikhúsið, Vesturbraut 17, kl. 13.00. Sett verður á svið sýningin Sumardagurinn fyrsti sem er samsett dagskrá með leik, söng og dansi. Um leikstjórn sér Kristlaug María Sigurðardóttir. Duushús, Bíósalur, kl. 14.00. Glerborgir. Samsýning listafólks undir stjórn myndlistarmannsins Guðmundar R. Lúðvíkssonar. Sýningin stendur til sunnudagsins 26. apríl og er opin frá kl. 13.00-17.00. Þennan sama dag kl. 15.00 verður Hulda Vilhjálmsdóttir með leiðsögn fyrir almenning um sýningu sína, Það sem gerðist, í Listasal.  

 Sýningin „Það sem gerðist" opnar í Listasafni Reykjanesbæjar  Föstudaginn 13. mars kl. 18.00 verður opnuð sýning á nýjum verkum Huldu Vilhjálmsdóttur í Listasafni Reykjanesbæjar og ber sýningin heitið Það sem gerðist. Verkin sem Hulda sýnir að þessu sinni eru fjölbreytt bæði að efnisvali og útliti eins og segir í texta sýningarstjórans, Aðalsteins Ingólfssonar í sýningarskránni: "Nú eru menn ekki settir út af sakramentinu fyrir ónóga fylgispekt við tiltekna hugmyndafræði, heldur sannar sig sérhver listamaður á eigin forsendum. Það hefur Hulda tvímælalaust gert, og af svo miklu örlæti að áhorfandinn á fullt í fangi með að fylgja henni eftir, gegnum völundarhús teikninga, málverk á striga, pappa, plast og tré, málaða aðskotahluti, litaða leirskúlptúra, frístandandi málverk, fljúgandi málverk, málverk með textum, frjálsa texta o.s.frv."  Sýningin er á dagskrá Safnahelgar á Suðurnesjum sem sett verður við sama tækifæri.  Sýningarsalur Listasafns Reykjanesbæjar í Duushúsum er opinn virka daga frá kl. 11.00 til kl. 17.00 og um helgar frá kl. 13.00-17.00. Sýningin stendur til 26.apríl og aðgangur er ókeypis.  Nánari upplýsingar gefa:   Hulda Vilhjálmsdóttir:Sími 846-8746 Aðalsteinn Ingólfsson: Sími 898-8466       Myndir frá opnun sýningarinnar

Laugardaginn 21. febrúar kl. 13.30 mun Eyjólfur Einarsson listmálari verða með leiðsögn fyrir almenning um sýningu sína, Söknuður, sem nú stendur í Listasal Duushúsa.  Nánari umfjöllun um sýninguna má finna á stikunni hér til vinstri undir flipanum sýningar/sýningar 2009.  

Sýningin Þríviður í Listasafni Reykjanesbæjar var valin ein af bestu myndlistarsýningum ársins að mati gagnrýnenda og blaðamanna Morgunblaðsins.Þríviður var hluti af Listahátíð í Reykjavík sl. vor en þar sýndu listamennirnir Guðjón Ketilsson, Hannes Lárusson og Helgi Hjaltalín Eyjólfsson. Sýningarstjóri var Aðalsteinn Ingólfsson. Í umsögn Morgunblaðsins um sýninguna segir: Hlutir og hugtök og athafnir eru merkingarhlaðin og áhorfandinn nær að upplifa sig í samræðu við verkin frekar en að vera sjálfur ábyrgur fyrir mögulegu inntaki þeirra.  

Fimmtudaginn 23. október verður opnuð sýning á nýjum verkum Arngunnar Ýrar í Listasafni Reykjanesbæjar og ber sýningin heitið Upphafið. Arngunnur Ýr stundaði nám í  Myndlista- og handíðaskóla Íslands og lauk prófum frá San Francisco Art Institute og Mills College í Bandaríkjunum. Arngunnur hefur sýnt víða og er löngu orðin þekkt fyrir sínar „himnesku“ náttúrumyndir.  Aðalsteinn Ingólfsson segir í sýningarskrá sem gefin er út af þessu tilefni: „ Í seinni tíð hafa málverk Arngunnar Ýrar fengið á sig æ frumspekilegra yfirbragð. Þær sýna landslag sem er í mótun og upplausn í senn og vekur því með okkur tilfinningar sem sveiflast á milli aðdáunar á þeirri endurnýjun sem stöðugt á sér stað í skauti náttúrunnar og ótta yfir eyðingarmætti hennar.”  Sýningin stendur til 7. desember.   Sýningarsalur Listasafnsins er opinn alla daga frá kl. 11.00 til kl. 17.00 og þar er ókeypis aðgangur. 

Laugardaginn 27. september var Ilmur Stefánsdóttir með leiðsögn fyrir almenning í listasafninu um sýningu sína Fjölleikar. Um 50 konur ofan af Skaga gerðu sér glaðan dag í Reykjanesbæ og nutu leiðsagnar Ilmar. "Af ánægju út að eyrum hver einasta kerling hló" segir einhvers staðar í dægurlagi um konur af Akranesi og það átti svo sannarlega við að þessu sinni enda um einstaklega skemmtilega og lifandi sýningu að ræða. Sýningin stendur til 19. október. Opnunartími safnsins er frá kl. 11.00 - 17.00 alla daga og aðgangur er ókeypis.

Listasafn Reykjanesbæjar tók í sumar þátt í Listahátíð í Reykjavík í fyrsta sinn með samsýningunni Þríviður. Þar leiða saman hesta sína listamennirnir Hannes Lárusson, Guðjón Ketilsson og Helgi Hjaltalín Eyjólfsson sem hafa þá sérstöðu á vettvangi samtímalistar að nota trjávið í ríkum mæli við gerð verka sinna. Meðhöndlun þeirra á efniviðnum er hins vegar ólík þótt áherslur þeirra beri keim af hugmyndalist og félagslega meðvitaðri list síðari ára. Á sýningunni er grennslast fyrir um hlutverk trjáviðar í íslenskri myndlist og tengslin við útskurðarlist fortíðar. Sýningin hlaut fádæma góða dóma í myndlistargagnrýni Morgunblaðsins þar sem framlag Listasafns Reykjanesbæjar var talið með því besta sem Listahátíð í Reykjavík 2008 bauð upp á. Laugardaginn 16. ágúst kl. 14.30 munu myndlistarmennirnir verða með leiðsögn fyrir almenning um sýninguna í Listasal Duushúsa. Sýningarsalur Listasafns Reykjanesbæjar er í Duushúsum. Þar er opið alla daga frá kl. 11.00 – 17.00 og aðgangur er ókeypis. Sýningin Þríviður stendur til 17. ágúst.

Listasafn Reykjanesbæjar tekur nú í fyrsta sinn þátt í Listahátíð í Reykjavík. Sýning Listasafnsins  ber heitið Þríviður og er samsýning þriggja íslenskra myndlistarmanna sem allir hafa notað trjávið í miklum mæli við gerð verka sinna.  Þeir eru Hannes Lárusson, Guðjón Ketilsson og Helgi Hjaltalín Eyjólfsson og eru m.a. þekktir fyrir skúlptúra sína og innsetningar.  Meðhöndlun listamannanna á þessum ævagamla efniviði er eins fjölbreytt og þeir eru margir, en áherslur þeirra bera þó keim af hugmyndalist og félagslega meðvitaðri myndlist síðari ára.  Á sýningunni er verkum þeirra stillt upp þannig að þau kallist á og kveiki neista hvert af öðru. Um leið verður grennslast fyrir um hlutverk trjáviðar í íslenskri myndlist og tengslin við útskurðarlist fortíðar. Sýningarstjóri er Aðalsteinn Ingólfsson.  Sýningin opnaði sunnudaginn 18. maí kl. 20.00 og er hér um að ræða sumarsýningu safnsins og mun hún því standa til 18. ágúst.

Föstudaginn 14. mars kl. 18.00 var opnuð sýning í Listasafni Reykjanesbæjar sem ber heitið Ljósmyndin ímyndin portrettið.  Á sýningunni mætast verk Sigríðar Melrósar Ólafsdóttur og Karls Jóhanns Jónssonar.  Það má segja að stefnumót listamannanna og verka þeirra sé byggt á því að nálgun þeirra á viðfangsefninu sé ólík þó bæði geri portrett. Bæði eiga það sameiginlegt að nota ljósmyndamiðilinn sem verkfæri í vinnuferlinu þó útkoman sé málverk, grafík eða teikningar. Sigríður sýnir mörg verk, grafíkverk og málverk af sömu manneskjunni sem er nektardansarinn Lísa. Áður hefur Sigríður gert fjölskyldumyndir, málað kaupmanninn á horninu og alla hans fjölskyldu og málað hópmynd af bifvélavirkjunum sem á undaförnum árum hafa séð um viðgerðir á bílnum hennar. Á síðasta ári urðu þó kaflaskil en þá sýndi hún í Gerðarsafni portrett af íbúunum á LitlaHrauni. Hún er að færast fjær þeim heimi sem stendur henni næst og er farin að skoða persónur og gera portrett af manneskjum sem lifa í undirheimum. Hún fjölfaldar á sýningunni myndir af sömu manneskjunni sem eykur enn á fjarlægð við sjálfa fyrirmyndina. –á sýningunni fá reyndar nokkrar myndir af eðalkarlmönnum að fylgja með sem  koma henni Lísu ekkert við. Karl Jóhann sýnir málverk þar sem hann hefur tekið fyrir tvær eða fleiri manneskjur á sama striga.  Karl málar gjarnan það fólk sem er í kringum hann, eiginkonu, börn,vini og sjálfan sig en á myndunum er þetta allt annað fólk, í öðrum hlutverkum. Hvert verk sýnir einhvern atburð eða stemmningu sem Karl spinnur upp og sviðsetur, sem virkar þannig að áhorfandinn gæti gleymt sér í að einblína á það sem ekki er sýnt. Í verkum Karls má oft greina beinar og óbeinar vísanir í listasöguna.  Spurningin er svo „hvað gerist“ þegar þessi verk eru saman komin?  Gæti þetta virkað eins og ættarmót þar sem kannski má sjá einhvern undirliggjandi fjölskyldusvip eða getur þetta jafnvel farið á hinn veginn þ.e. að allir verði sem ókunnugir samankomnir á almenningssvæði..... Sýningarstjóri er Inga Þórey Jóhannesdóttir.Sýningarsalur Listasafns Reykjanesbæjar er  í Duushúsum.  Þar er opið alla daga frá kl. 11.00-17.00 og aðgangur er ókeypis.  Sýningin stendur til 4. maí.Nánari upplýsingar:Inga Þórey Jóhannesdóttir: 662-8785Sigríður Melrós Ólafsdóttir:663-9894Karl Jóhann Jónsson:  896-5669

Í tilefni opnunar á nýju útibúi Glitnis í Reykjanesbæ færðu forsvarsmenn bankans  Listasafni Reykjanesbæjar glæsilegt málverk eftir Gunnlaug Blöndal.  Málverkið sýnir konur við saltfiskvinnslu og hefur verið í eigu bankans um áraraðir og hefur verið staðsett í húsnæði bankans að Hafnargötu 60 síðan 1963.  Verkið er nú til sýnis á jólasýningu safnsins í Listasalnum í Duushúsum en sú sýning mun standa til 23. desember n.k.  Glitnir, með fyrrverandi útibússtjórann Unu Steinsdóttur í fararbroddi,  hefur frá fyrstu tíð verið dyggur stuðningsaðili Listasafnsins og nú er í gildi  samningur milli safnsins og bankans þar sem Glitnir greiðir aðgangseyri þannig að ókeypis er fyrir gesti á sýningar í Duushúsum.  Samningur Glitnis og Listasafnsins er gott dæmi um ánægjulegt samstarf öflugs fyrirtækis og menningarstofnunar í þágu almennings.

Sunnudaginn 25. nóvember kl.14.00 býður Listasafn Reykjanesbæjar öllum sem áhuga hafa til leiðsagnar listakonunnar Bjargar Örvar um sýningu hennar. Sýning Bjargar er í sýningarsal Listasafns Reykjanesbæjar í Duushúsum. Björg hefur sýnt víða og er löngu orðin þekkt fyrir sérkennileg málverk sem erfitt er að skilgreina, en  hvort sem þau teljast náttúrumyndir eða ekki eru þau fyrst og fremst einstök. Málverkasýning Bjargar Örvar opnaði 19. október og líkur henni 2. desember. Í Duushúsum er opið alla daga frá kl. 13.00-17.30 og aðgangur er ókeypis.  

Nú líður að lokum sýningarinnar AFTUR í sýningarsal Listasafns Reykjanesbæjar í Duushúsum en henni lýkur 14. október. Um er að ræða ljósmyndir eftir Einar Fal Ingólfsson þar sem hann gerir æskuár sín í Keflavík að myndefni. Yfirskrift sýningarinnar er : "Ég sneri aftur til bernskuslóðanna og mátaði minningar við raunveruleikann. Sumt er breytt, annað síður. Og sumir eru enn til staðar." Sýningin hefur fengið góða dóma og fjöldi gesta lagt leið sína í Listasafnið. Listamaðurinn Einar Falur mun taka á móti gestum laugardaginn 6. október kl. 15.00 og ganga með þeim um sýninguna og segja þeim frá sínum hugrenningum í tengslum við myndirnar. Duushúsin eru annars opin alla daga frá kl. 13.00-17.30 og aðgangur er ókeypis.

Sýning á Húsafellsmyndum Ásgríms Jónssonar líkur sunnudaginn 19. ágúst. Sýningin kemur frá Listasafni Íslands en L.Í. á stærsta safn verka Ásgríms. Húsafellsmyndir Ásgríms eru ákveðinn þáttur í þessari safneign en Ásgrímur dvaldist mikið á Húsafelli í Borgarfirði til að mála. Þangað kom hann fyrst til sumardvalar árið 1915 og aftur 1917 og 1919, eftir það varð Húsafell sá staður sem Ásgrímur tók mestu ástfóstri við og þar dvaldist hann reglulega á sumrin fram eftir ævi.  Um er að ræða bæði olíuverk og vatnslitamyndir og sýningarstjóri er Harpa Þórsdóttir. Sýningin hefur verið vel sótt og hlotið góða dóma.   Sýningarsalur Listasafns Reykjanesbæjar er í Duushúsum og þar er opið alla daga frá 13:00 til 17:30 og stendur sýningin til 19. ágúst.

Föstudaginn 27. apríl kl. 18.00 verður opnuð sýning á Listasafni Reykjanesbæjar á verkum Hafsteins Austmanns, bæði olíu málverkum, akríl sem og akvarella myndum.  Hafsteinn hefur lengi talist til okkar allra færustu listamanna og spanna verkin á sýningunni tímabilið 1986-2007.   Aðalsteinn Ingólfsson segir: ,,Myndir Hafsteins, olíumálverk jafnt sem vatnslitamyndir, virðast ríkari af  blæbrigðum tilfinninganna en flest annað sem flokkast undir myndlist í dag. Hins vegar tekur listamaðurinn áhorfendum sínum vara fyrir að tengja tilfinningar eða upplifanir sem kunna að slæðast inn í myndir hans við þann sem heldur um pentskúfinn; myndirnar séu honum tæki til að vinna sig frá upplifunum sínum, ekki til að velta sér upp úr þeim.”   Sýningin er opin alla daga frá kl. 13.00-17.30 og stendur til 10. júní. Listasalurinn er í Duus-húsum við Duusgötu 2-8 í Reykjanesbæ. Allar nánari upplýsingar má finna í síma 421 – 3796.

Laugardaginn 20. janúar kl. 14.00 verður opnuð sýning Hlaðgerðar Írisar Björnsdóttur og Arons Reys Sverrissonar í sýningarsal Listasafns Reykjanesbæjar í Duushúsum og ber sýningin heitið Tvísýna. Um er að ræða málverk í anda raunsæisstefnu af börnum, húsum og umhverfi. Aðalsteinn Ingólfsson segir um þessa sýningu í inngangi að sýningarskrá “að verk þeirra Hlaðgerðar Írisar og Arons Reys þrífist á víxlverkan hins þekkta og óþekkta, um leið og þau kasti á milli sín - og til áhorfenda - spurningunni um náttúru hinnar hlutlægu listsýnar, hvort hún sé spegill eða gluggi.”   Sýningin er opin alla daga frá kl. 13.00-17.30 og stendur til 4. mars.    

Sunnudaginn 3. desember er síðasti sýningardagur á sýningu Sigtryggs Bjarna Baldvinssonar í Listasafni Reykjanesbæjar. Sýningin ber heitið Sog og er á henni að finna m.a. olíuverk sem gera tilraun til þess að fanga hreyfanleika og kraft árvatnsins. Listamaðurinn verður með leiðsögn um sýninguna klukkan 14.00. á sunnudaginn og eru allir velkomnir og um leið hvattir til að mæta.

Föstudaginn 20. október kl. 18.00 verður opnuð einkasýning Sigtryggs Bjarna Baldvinssonar á Listasafni Reykjanesbæjar og ber sýningin heitið Sog.  Viðfangsefni listamannsins er straumvatn og sýnir hann þarna ný málverk unnin með olíu á striga og rýmisverk. Sigtryggur Bjarni er fæddur árið 1966 og hefur haldið og tekið þátt í fjölda sýninga undanfarin ár, síðasta einkasýning hans var í Gallery Turpentine árið 2005. Sýningin er opin alla daga frá kl. 13.00-17.30 og stendur til 3. desember.   Við sama tækifæri verður undirritaður samstarfssamningur milli Glitnis og Listasafnsins.  

Föstudaginn 1. september kl. 18:00 var opnuð sýning í Listasafni Reykjanesbæjar á verkum Steinunnar Marteinsdóttur, bæði keramikverkum og málverkum.  Steinunn hefur lengi talist til okkar allra færustu listamanna og spanna verkin tímabilið 1961-2006.  Steinunn var í hópi þeirra fyrstu er lögðu fyrir sig keramik á Íslandi og eftir útskrift úr Handíða- og myndlistarskóla Íslands hélt hún til frekara náms í Þýskalandi.  Steinunn keypti ásamt manni sínum Sverri Haraldssyni, Hulduhóla í Mosfellsbæ árið 1969 og hefur rekið þar vinnustofu og gallerí síðan.  Steinunn hefur á löngum ferli sýnt verk sín víða um heim og hefur átt stóran þátt í að skapa keramik á Íslandi þann sess innan listarinnar sem verðugur er.Sýningin er opin alla daga frá kl. 13:00-17:30 og stendur til 15. október.

Föstudaginn 21. október kl. 18.00 verður opnuð einkasýning Húberts Nóa Jóhannessonar á Listasafni Reykjanesbæjar.  Sýningin ber heitið 12 m.y.s (Altitude) og samanstendur af tveimur myndröðum og videoverki. Húbert Nói vinnur verk sín út frá GPS punktum og er önnur myndröðin 5 mælipunktar frá umhverfi Hjaltlandseyja og hin 5 mælipunktar við Búrfell.  Videoverkið er af blásandi háhitaborholu sem líta má á sem myndbirtingu skapandi athafnar.   Í sýningarskrá segir Ólafur Gíslason m.a.: “Þegar við hugleiðum óendanleikann í ríki náttúrunnar þá hættir hugsunin að höndla nokkurn hlutstæðan veruleika og fer ósjálfrátt að flökta um innlönd ímyndunaraflsins. Mörkin á milli hlutveru og hugveru leysast upp í móðu draumalandanna þar sem myndirnar þenjast út okkur verður villugjarnt, því þar duga engin GPS-mælitæki lengur; mælanleikinn er ekki lengur til staðar. Því vaknar þessi spurning: hvar liggja mörkin þarna á milli, hvar hættir hugurinn að "villast" í löndum dagdrauma okkar og hvar byrjar hinn haldbæri og hlutstæði veruleiki, sem við getum höndlað með mælitækni okkar, þannig að við vitum nákvæmlega hvar við erum stödd í veröldinni og þá um leið hver við sjálf erum í raun og veru?”   Húbert Nói hefur haldið fjölda einkasýninga og tekið þátt í samsýningum frá árinu 1986.  Hann hefur hlotið viðurkenningu sem einn af okkar áhugaverðustu listamönnum í dag.  Sýningin er opin alla daga frá kl. 13.00-17.30 og er staðsett í sýningarsal Listasafnsins í Duushúsum, Duusgötu 2-10 í Reykjanesbæ.  Sýningin stendur til 4. desember n.k.

 Á sumarsýningu Listasafns Reykjanesbæjar má nú sjá sænskt listgler. Um er að ræða hina höfðinglegu gjöf sem Svíakonungur, Carl XVI Gústav, afhenti íslensku þjóðinni í október árið 2004 og varðveitt er í Hönnunarsafni Íslands. Verkin á sýningunni eru í kringum 60 eftir 50 helstu glerlistamenn Svía, jafnt sjálfstæða glerblásara sem og starfsmenn stóru glerverksmiðjanna, Kosta Boda og Orrefors. Um er að ræða úrval hins besta úr heimi nytjaglers og skúlptúrglers og þarna hefur öllum tæknibrögðum nútíma glerlistamanna verið beitt á töfrandi hátt. Aðalsteinn Ingólfsson kemst þannig að orði um glerið í sýningarskránni; “Vonandi nær það að “heilla og táldraga” Suðurnesjamenn eins og góð glerlistaverk hafa alltaf gert, þökk sé gegnsæinu, margþættri virkjun birtunnar og endurspegluninni sem eru aðalsmerki þess.” Sýningin kemur frá Hönnunarsafni Íslands og mun standa til 28. ágúst n.k. Sýningarsalur Listasafns Reykjanesbæjar í Duushúsum er opinn alla daga frá kl. 13.00-17.30.

Laugardaginn 12. mars n.k. kl. 15.00 verður opnuð í sýningarsal Listasafns Reykjanesbæjar í Duushúsum sýningin Erlingur Jónsson og samtímamenn. Erlingur Jónsson varð fyrstur til að hljóta heiðursnafnbótina Listamaður Keflavíkur sem nú kallast Listamaður Reykjanesbæjar. Erlingur þótti vel að þessum titli kominn þar sem hann hafði í áratugi unnið að listsköpun í þágu bæjarbúa, bæði með eigin verkum og ekki síður sem áhrifavaldur ungra og upprennandi listamanna í bænum en hann starfaði lengi sem kennari við grunnskóla bæjarins. Síðustu árin hefur Erlingur lifað og starfað í Osló. Á þessari sýningu er lögð áhersla á að sýna lágmyndir Erlings Jónssonar og brjóstmyndir en þær hafa ekki áður verið sýndar saman og sumar aldrei sést opinberlega fyrr. Einnig er persónuleika Erlings gerð skil með ljósmyndum og myndbandi, því maðurinn sjálfur er lífsins listaverk! Í sýningarskránni segir Aðalsteinn Ingólfsson listfræðingur m.a. um Erling: “ Þetta tvennt, innlifunarhæfileikinn og bókmenntirnar, er sennilega það sem sett hefur ríkulegast mark á listsköpun Erlings sjálfs. Hið fyrrnefnda skýrir að hluta næmið sem kemur fram í myndum af samtímamönnum, meðvitundina um að sérhver andlitsdráttur skipti máli þegar móta skal eftir lifandi andliti. Bókmenntirnar eru svo kveikjan að mörgum og fjölbreytilegum skúlptúrum listamannsins, sem velunnarar hans í Keflavík hafa sett upp í bæjarlandinu á undanförnum árum. “ Í sýningarskránni er einnig yfirlitskort af bænum þar sem búið er að staðsetja verk Erlings og gestum þannig gert auðveldara að skoða verkin í eðlilegu umhverfi. Auk verka Erlings Jónssonar má sjá á sýningunni ljósmyndir eftir Arnar Fells, Tom Sandberg og Vigdis Hindhammer og einnig er myndband eftir Viðar Oddgeirsson sem m.a. er byggt á viðtali Jónatans Garðarssonar við Erling. Sýningin er opin alla daga frá kl. 13.00 – 17.30 og stendur til 24. apríl.

Fimmtudaginn 3. mars kl. 20:00 verða haldnir tónleikar í Duushúsum í Reykjanesbæ. Þar leikur blásaraoktettinn Hnúkaþeyr efnisskrá með tónlist eftir Wolfgang Amadeus Mozart og Gordon Jacob. Tónskáldin Mozart og Jacob eiga það sameiginlegt að vera báðir afar hrifnir af blásturshljóðfærum. Mozart skrifaði þrjár blásaraserenöður og á tónleikunum verður leikin sú í c-moll. Efnisskráin endurspeglar að nokkru leyti þær tónbókmenntir sem til eru því að frá klassíska tímanum verður að fara fram til 20. aldarinnar til að finna tónlist fyrir blásaraoktett. Divertimento í Es-dúr eftir Gordon Jacob er kryddað með nýjum hljómi og ómstríðum frá síðustu öld þar sem hornin fá að njóta sín. Hnúkaþeyr hefur tónleikan á að leika þekkt stef úr óperunni Brúðkaup Fígarós eftir Mozart. Hnúkaþey skipa Peter Tompkins og Eydís Franzdóttir á óbó, Rúnar Óskarsson og Ármann Helgason á klarinett, Anna Sigurbjörnsdóttir og Emil Friðfinnsson á horn, Darri Mikaelsson og Kristín Mjöll Jakobsdóttir á fagott. Tónleikarnir eru samstarfsverkefni Félags íslenskra tónlistarmanna, Tónlistarskóla Reykjanesbæjar og menningarfulltrúa Reykjanesbæjar með styrk frá Menntamálaráðuneytinu.

Í Keflavík opnar gallerý fyrir nútímalist á Hafnargötu 22. Gallerýið heitir SuðSuðVestur og er í umsjón Thelmu Bjarkar Jóhannesdóttur og Ingu Þóreyjar Jóhannsdóttur myndlistarkennara í Holtaskóla og Fjölbrautaskóla Suðurnesja.  Fyrsta sýning gallerýsins mun opna laugardaginn 22. janúar kl.15 með sýningu Magnúsar Pálssonar. Magnús Pálsson hóf sinn feril innan veggja leikhússins. Hann teygði sig fljótt yfir á öll svið listarinnar og sem myndlistmaður á hann rætur sínar m.a. að rekja til fluxus-hreyfingarinnar. Magnús var einn af forsprökkum SÚM og var frumkvöðull í stofnum nýlistadeildar við Myndlista og handíðaskóla Íslands. Undanfarin ár hefur hann unnið mikið með video, hljóð, texta, raddir og rýmisverk og samið kórverk. Magnús vinnur að þessu sinni innsetningu með húmórísku ívafi sérstaklega ætlaða staðnum. Opið verður fimmtudaga og föstudaga milli 16 og 18 og laugardaga og sunnudaga milli 14 og 17. Sýningunni lýkur sunnudaginn 13. febrúar. SUÐSUÐVESTUR er undir verndarvæng Listasafns Reykjanesbæjar og fékk nú í haust styrk frá Reykjanesbæ til að hrinda starfseminni úr vör.   Suðsuðvestur er opið fjóra daga vikunnar þ.e. fimmtudaga og föstudaga frá kl.16 - 18 og laugardaga og sunnudaga frá kl.14–17. Annars er opið eftir samkomulagi.  sjá nánar á www.sudsudvestur.is

Í sýningarsal Listasafnsins í Duus-húsum stendur nú yfir sýning á olíuverkum úr safneigninni. Um er að ræða verk eftir ýmsa listmálara frá mismunandi tímum þar sem náttúra Íslands er viðfangsefnið. Má þar m.a. sjá verk eftir gömlu meistarana Kjarval, Jón Stefánsson, Ásgrím Jónsson og Þórarin B. Þorláksson. Sýningin er opin alla daga frá 13.00-17.30 og stendur til jóla.